జనసేనలోకి వైసీపీ నుండి భారీ చేరికలు

తాడేపల్లిగూడెం, ఆగస్టు 17:
పశ్చిమగోదావరి జిల్లా తాడేపల్లిగూడెం పట్టణంలో ఆదివారం వైసీపీ నుండి జనసేన పార్టీలోకి పెద్ద ఎత్తున చేరికలు జరిగాయి. గూడెం మాజీ మున్సిపల్ వైస్ చైర్మన్ బొడ్డు సాయిబాబా, తాడేపల్లిగూడెం నియోజకవర్గ రెడ్డి సంఘం అధ్యక్షులు, ఛాంబర్ ఆఫ్ కామర్స్ కోశాధికారి నాగేందర్ రెడ్డి తమ అనుచరులతో కలిసి 500 మంది జనసేన పార్టీలో చేరారు.

ఈ సందర్భంగా తాడేపల్లిగూడెం ఎమ్మెల్యే, ప్రభుత్వ విప్ బొలిశెట్టి శ్రీనివాస్ వీరికి జనసేన కండువా కప్పి ఆహ్వానించారు.

బొలిశెట్టి శ్రీనివాస్ వ్యాఖ్యలు

“జనసేన పార్టీ ప్రజల అభ్యున్నతికి కట్టుబడి ఉన్న విలువలతో కూడిన పార్టీ. పవన్ కళ్యాణ్ సిద్ధాంతాలు సామాన్యుడికి అండగా నిలుస్తాయి” అని ఎమ్మెల్యే అన్నారు.

ప్రజలు అఖండ మెజారిటీతో తనను గెలిపించారని, వచ్చే ఐదేళ్లలో నియోజకవర్గాన్ని అభివృద్ధి దిశగా నడిపిస్తానని హామీ ఇచ్చారు.

“ప్రతి కుటుంబానికి నేను పెద్ద కొడుకులా ఉంటాను. ఎవరైనా కష్టాల్లో ఉన్నా నా ఇల్లు తలుపులు ఎప్పుడూ తెరిచి ఉంటాయి” అని తెలిపారు.

అభివృద్ధి పనుల వివరాలు

ఇప్పటికే అనేక రహదారులు వేయించామని, P4 ప్రాజెక్ట్లో భాగంగా క్రికెట్ స్టేడియం, స్విమ్మింగ్ పూల్, జడ్పీ స్కూల్ అభివృద్ధి జరుగుతున్నాయని తెలిపారు.

రెండు కోట్లతో టౌన్ హాల్ నిర్మాణం, సీఎం రిలీఫ్ ఫండ్ ద్వారా 2.45 కోట్ల రూపాయల సహాయం ప్రజలకు అందజేసిన విషయాన్ని గుర్తు చేశారు.

తాడేపల్లిగూడెంలో ఎయిర్‌పోర్ట్ నిర్మాణం జరుగుతుందని హామీ ఇచ్చారు.

ప్రతిపక్షంపై విమర్శలు

గత వైసీపీ పాలనలో టిడిఆర్ బాండ్లు, సొసైటీలు, మున్సిపాలిటీ, గ్రావెల్, ఇసుకలో విపరీతమైన అవినీతి జరిగిందని ఆరోపించారు.

“ప్రజలు ఎయిర్‌పోర్ట్ కోసం ఎదురుచూస్తుంటే, కొందరు కోర్టు కేసులతో అడ్డంకులు సృష్టిస్తున్నారు” అని మండిపడ్డారు.

ఫ్లైఓవర్ నిధులు మింగి ఐదు కోట్లతో ఇల్లు కట్టుకున్నారని మాజీ శాసకుడిపై విమర్శలు గుప్పించారు.

కరోనా సమయంలో తాను ప్రజల మధ్య ఉండి సహాయం చేసిన విషయాన్ని గుర్తు చేస్తూ, ప్రతిపక్ష నేతలు అయితే బెంగళూరుకు పారిపోయారని ఎద్దేవా చేశారు.

కూటమి ప్రభుత్వంపై విశ్వాసం

కూటమి ప్రభుత్వంలో 80% సూపర్ సిక్స్ పథకాలు అమలు అవుతున్నాయని చెప్పారు.

“నరేంద్ర మోడీ ఆశీస్సులు, చంద్రబాబు నాయకత్వం, పవన్ కళ్యాణ్ సహకారం కలిస్తే రాష్ట్రం అభివృద్ధి పథంలో దూసుకుపోతుంది” అని పేర్కొన్నారు.

కూటమిలో విభేదాలు సృష్టించే ప్రయత్నాలు వృథా అవుతాయని, అందరినీ కలుపుకుంటూ ముందుకు సాగుతామని హామీ ఇచ్చారు.

పాల్గొన్న నాయకులు

ఈ కార్యక్రమంలో పట్టణ అధ్యక్షులు వర్తనపల్లి కాశి, మండల అధ్యక్షులు అడప ప్రసాద్, పుల్ల బాబి, తోటరాజ, సబ్జా సుబ్బు, చాపల రమేష్, పై బోయిన రఘు, పై బోయిన వెంకటరామయ్య, పాలూరి వెంకటేశ్వరరావు, అడబాల నారాయణమూర్తి, ముత్యాల ఆంజనేయులు, లక్ష్మణ రెడ్డి, గుండుమోగుల సురేష్, మలపాక చిట్టి, రైతు సోమరాజు, నిమ్మకాయల సత్యనారాయణ తదితరులు పాల్గొన్నారు